ලොව පුරා ක්‍රිස්තියාණි ජනතාව ජේසුස් ක්‍රිස්තුස් වහන්සේගේ උත්පත්තියේ 2025 වෙනි සංවත්සරය සමරත් දී, ශුද්ධෝත්තම රොහාන් ලලිත් අපොන්සු අපොස්තුළුතුමා සිය අපොස්තුළු ජීවිතය තුල පනස් එක් වන වරටත් ජේසුස් ක්‍රිස්තුස් වහන්සේගේ උත්පත්තිය හෙවත් නත්තල 2025 නත්තල් මැදියම් රැයේ දී සමරණු ලැබූහ.
නත්තල් දිව්‍ය පූජාව ශුද්ධෝත්තම අපොස්තුළුතුමන් පුද කරනු ලැබූවේ කටුනායක අප ස්වාමිදූගේ සිද්ධස්ථානයේ දර්ශණ දේව මන්දීරය තුලයි. විවිධ ප්‍රදේශයන්ගෙන් පැමිණ සිටි සැදැහැවතුන් දර්ශණ දෙව්මැඳුර තුල මෙන්ම දර්ශණ භූමිය පුරා ද රැස්ව සිටි අතර, ශුද්ධෝත්තම අපොස්තුළුතුමන් මෙලොව මෙම ජීවිත සමයේ, මේ මහා පෘතුවිය ස්පර්ෂ කිරීමෙන් පසුව උන්වහන්සේගේ ජීවිතයට උදා වූ හැටනව වන නත්තල එයයි.
ජේසුස් ක්‍රිස්තුස් වහන්සේ මේ ලෝකයේ ජීවතුන් අතර සිටියදී තෝරාගනු ලැබූ අපොස්තුළුවරුන් සංඛ්‍යාව දොළොසක් වන අතර, උන්වහන්සේ ස්වර්ගාරෝහණයෙන් පසුව මෙලොවට දර්ශණය වී තෝරාගනු ලැබූ අපොස්තුළුවරුන්ගේ සංඛ්‍යාව දෙදෙනෙක්. සිරියාවේ, දමස්කස් නගරයේ දී, දර්ශණය වී තෝරාගනු ලැබූ ශුද්ධෝත්තම පාවුළු අපොස්තුළුතුමා, දර්ශණය වී තෝරාගනු ලැබූ පළමුවන අපොස්තුළුතුමයි. මේ සියළු අපොස්තුළුවරුන් මේ වන විට මෙලොව ජීවතුන් අතර නොමැති අතර, ජේසුස් ක්‍රිස්තුස් වහන්සේ ශ්‍රී ලංකාවේ, කටුනායක නගරයේ දී, දර්ශණය වී තෝරාගනු ලැබූ දෙවන අපොස්තුළුතුමා වන ශුද්ධෝත්තම රොහාන් ලලිත් අපොන්සු අපොස්තුළුතුමා පමණක් දැනට අප අතර ජීවත් වෙයි.
1975 පෙබ්‍රවාරි 7 වෙනි දින අපොස්තුළුවරයෙන් පිදුම් ලැබූ උන්වහන්සේ, සිය ප්‍රථම නත්තල් දිව්‍ය පූජාව පවත්වනු ලැබුවේ, 1975 දෙසැම්බර් 24 වෙනි දින මධ්‍යම රාත්‍රියේ දී යි. ඒ අනුව 2025 දෙසැම්බර් 24 වෙනි දින මධ්‍යම රාත්‍රියේ උන්වහන්සේ, කටුනායක අප ස්වාමිදූගේ සිද්ධස්ථානයේ, දර්ශණ දෙව් මැදුර තුල දී පුද කරනු ලැබුවේ, සිය අපොස්තුළු දිවියේ පනස්එක් වෙනි නත්තල් මංගල දිව්‍ය පූජාවයි. වසර පනස් එකකට පෙර ශුද්ධෝත්තම අපොස්තුළුතුමා ප්‍රථම නත්තල් දිව්‍ය පූජා මෙහෙය පවත්වනු ලැබූ ස්ථානයේ ම, මෙදා පනස් එක් වෙනි නත්තල් මංගල පූජාව පැවැත්වීම ද විශේෂත්වයක්.
ඒ වගේම තවත් කිව යුතු ම කරුණක්. ජේසුස් ක්‍රිස්තුස් වහන්සේ තෝරාගනු ලැබූ අපොස්තුළුතුමන්ලා අතරින්, අපොස්තුළුතුමෙකු ලෙස මේ වන විට අවුරුදු පනස් එකක් ජීවත් වූ දෙවන අපොස්තුළුතුමා වන්නේ, ශුද්ධෝත්තම රොහාන් ලලිත් අපොන්සු අපොස්තුළුතුමයි. අපොස්තුළු දිවිය තුල අවුරුදු පනස් එකක් ජීවත් වූ පළමු අපොස්තුළුතුමා වූයේ ශුද්ධෝත්තම ජුවාම් අපොස්තුළුතුමා වන අතර, 2026 පෙබ්‍රවාරි 7 වෙනි දිනය පසුකලහොත්, අප ශ්‍රී ලාංකික ප්‍රථම අපොස්තුළුතුමා වන ශුද්ධෝත්තම රොහාන් ලලිත් අපොන්සු අපොස්තුළුතුමා, අවුරුදු දෙදහසකට ආසන්න කාලයක් තුල, මෙළොව ජීවිතය රැකගත් ඒ පළමුවන අපොස්තුළුතුමාගේ වාර්තාව බිඳ දමනු ලබනවා. ඒ සඳහා ඇත්තේ තව දින කීපයක් පමණයි.
ජේසුස් ක්‍රිස්තුස් වහන්සේ මෙළොව ජීවත්ව සිටිය දී තෝරාගනු ලැබූ අපොස්තුළුවරු දොළොස්දෙනා අතරින් එක් අයෙක් වූ ජුදාස් සිය දිවි හානිකරගනු ලැබූ අතර, ශුද්ධෝත්තම ජුවාම් අපොස්තුළුතුළුතුමා හැරුණකොට අනික් සියළුම අපොස්තුළු තුමන්ලා මරා දමනු ලැබුවා. උතුරන තෙල් කටාරමක් තුල ගිල්වා ශුද්ධෝත්තම ජුවාම් අපොස්තුළුතුළුතුමන්ව ද මරා දමන්නට උත්සහ කරනු ලැබුවත්, එය ව්‍යර්ත වූ නිසා, ඒ මොහොතේ උන්වහන්සේ මරණයෙන් බේරුණා. පසුව ශුද්ධෝත්තම ජුවාම් අපොස්තුළුතුළුතුමා මිනිසුන්ගෙන් වෙන් වී, ජන ශුන්‍ය ප්‍රදේශයක තනිව හුදකලාව ජීවත් වීමට පටන් ගත්තා. ඒ නිසාම අවුරුදු සියයකටත් වැඩිකාලයක් ජීවත්ව ස්වභාවික අන්දමින් අභාවප්‍රාප්ත වුනා.
ජේසුස් ක්‍රිස්තුස් වහන්සේ දර්ශණය වී තෝරාගනු ලැබූ පළමුවන අපොස්තුළුතුමා වූ ශුද්ධෝත්තම පාවුළු අපොස්තුළුතුමාව තොරාගනු ලැබුවේ ක්‍රිස්තු වර්ෂ 35 දී පමණ වන අතර, ක්‍රිස්තු වර්ෂ 65 දී හිස කඳින් වෙන්කර මරා දමනු ලැබූ බැවින්, එම අපොස්තුළුතුමන්ට ද, අපොස්තුළුතුමෙක් ලෙස මෙලොව ජීවත් වන්නට ලැබුණේ වසර තිහක් වැනි කාලයක් පමණයි.
1975 පෙබ්‍රවාරි 7 වෙනි දින, ‘අපොස්තුළුවරය’ නැමැති දිව්‍ය පත්වීම ලැබූ ශුද්ධෝත්තම රොහාන් ලලිත් අපොන්සු අපොස්තුළුතුමා මේ ලෝකයේදී ක්‍රිස්තුභක්තිකයෙකුට ලබාගත හැකි, අති ශ්‍රෙෂ්ඨ, ඉහළම පත්වීම ලබාගැනීමට හිමිකම් ලැබූවා. සියළු ක්‍රිස්තියාණින්ගේ නායකයාණන් වන ජේසුස් ක්‍රිස්තුස් වහන්සේ විසින්ම දානය කරනු ලැබූ මෙම පත්වීම, වර්ෂ දෙදහස් විසිපහක් තුල ලබාගෙන ඇති සංඛ්‍යාව දසසතර දෙනෙක් පමණයි. අවසානයට අපොස්තුළුවරයෙන් පිදුම් ලද දසසතරවැන්නා වූයේ, දැනට කටුනායක අප ස්වාමිදූගේ සිද්ධස්ථානයේ වැඩසිටින ශුද්ධෝත්තම රොහාන් ලලිත් අපොන්සු අපොස්තුළු තුමාණෝයි.
2025 දෙසැම්බර් 24 වෙනි දා මධ්‍යම රාත්‍රියේ ඇරඹි නත්තල් දිව්‍ය පූජා මෙහෙය ආරම්භ කිරීම සදහා ශුද්ධෝත්තම රොහාන් ලලිත් අපොන්සු අපොස්තුළුතුමා ඉතාමත් සන්සුන් ගමනින් දර්ශණ දෙව්මැදුරට පිවිසියා.
රන්වන් පූජා ඇඳුමින් සැරසී සිටි ශුද්ධෝත්තම අපොස්තුළු තුමා, ‘බෙත්ලෙහෙම් ජේසු බිළිඳු ප්‍රතිමාවෙන්’ සියළුම බැතිමතුන්ව ආසිරි ගන්වනු ලැබුවා.
ජේසුස් ක්‍රිස්තුස් වහන්සේ දර්ශණය වී තෝරාගනු ලැබූ දෙවන අපොස්තුළුතුමා වූ ශුද්ධෝත්තම රොහාන් ලලිත් අපොන්සු අපොස්තුළුතුමාව තොරාගනු ලැබුවේ ක්‍රිස්තු වර්ෂ 1975 පෙබ්‍රවාරි 7 වෙනි දින නිසා, උන්වහන්සේ 1975 දෙසැම්බර් 24 වෙනි දින මැදියම් රෑ පළමු වන නත්තල් දිව්‍ය පූජාව ද පවත්වා, අපොස්තුළු දිවියේ, පනස් එක් වන වසරේ, නත්තල් මංගල පූජාව 2025 දෙසැම්බර් 24 වෙනි දින මධ්‍යම රාත්‍රියේ දී පවත්වනු ලැබුවේ, සිය අපොස්තුළු දිවියේ, අභිමානවත්, සන්ධිස්ථානයක් සනිටුහන් කරමිනුයි. මේ ඡායාරූප එම නත්තල් මංගල දිව්‍ය පූජාවෙනුයි
